მათემატიკის რესურსები სოფელ ჩორჩანას სკოლისთვის

ვცხოვრობ პატარა, მაღალმთიანი სოფელ ჩორჩანაში და 8 თვეა ვასწავლი ამავე სოფლის დაწყებით სკოლაში, რომელშიც სულ ოთხი კლასი და ცხრა თვალებ აციმციმებული მოსწავლეა. ამ პატარა ბავშვებს ყველაფერი უხარიათ, გაკვეთილზე შეტანილი ფერადი ფურცლებიც კი მათთვის დიდი მოტივაციაა. ჩვენი სკოლა მცირე კონტიგენტიანია და არ გვყოფნის ბიუჯეტი, რომ ელემენტარული საჭიროებების გარდა რაიმეთი გავიმრავალფეროვნოთ სასწავლო პროცესი. არადა, დაწყებით კლასში საინტერესო საუბრებზე მეტად, ლამაზი ნივთებით, თვალსაჩინოებებითა და თამაშით უფრო უკეთესად სწავლობენ ბავშვები. ჩვენ ისტორიულ სოფელში ვცხოვრობთ, დიდი იოანე (თორნიკე ჩორჩანელი) გაიზარდა ამ სოფელში და მთელი გულით მინდა, ჩვენმა სკოლამ მასავით ღირსეული ქართველები აღზარდოს და სკოლის პერიოდი ნათელ მოგონებებად დარჩეთ მეხსიერებაში. ისედაც რთულია სოფლის ბავშვების ცხოვრება. მათთვის სკოლაა ერთადერთი ნათელი წერტილი, სადაც მინდა, რომ ბევრი სიხალისე და სიფერადე ხვდებოდეთ. დარწმუნებული ვარ, დამხმარე რესურსების საშუალებით, ბუნებისმეტყველებისა და მათემატიკის სწავლების პროცესი მათთვის საინტერესო და სახალისო იქნება, ხოლო მიღებული ცოდნა – უფრო მყარი.